Рақобат қўмитаси ресторанларни огоҳлантирди: Рамазонда “акция сет”ни мажбурлаш тақиқланди
Рақобатни ривожлантириш ва истеъмолчилар ҳуқуқларини ҳимоя қилиш қўмитаси умумий овқатланиш корхоналарини Рамазон ойида мижозларни “акция сетлар”ни олишга мажбурламасликка чақирди. Қўмита айрим кафе ва ресторанларда “комплекс тўплам”ни мажбурий таклиф қилиш, минимал нарх қўйиб, бошқа вариантларни чеклаш ҳолатлари учраётганини билдирди.
Таъкидланишича, бундай ёндашув мижознинг эркин танлов ҳуқуқини торайтиради. Яъни одам “сет” эмас, айнан ўзи хоҳлаган таомни буюртма қилмоқчи бўлса, бунга тўсиқ қўйилмаслиги керак.
Қўмита эслатишича, қонунчиликка кўра истеъмолчи товар ва хизматларни эркин танлаш, сифат талаб қилиш ҳуқуқига эга. Шунингдек, сотувчи ёки ижрочи истеъмолчига қўшимча товар ёки хизматни зўрлаб юклай олмайди — “фақат сет бўлади” деган гап айнан шу жойда муаммо.
Яна бир муҳим жиҳат: соғлиқ масаласи. Сет таркибида аллергия чақириши мумкин бўлган маҳсулотлар бўлса-ю, мижознинг ҳолати инобатга олинмаса, бу янада жиддий хатарга айланади.