Слуцкий бошқарувидаги «Шанхай Шенхуа» АЧЛда мағлуб бўлди
Осиё Чемпионлар лигасида етти турдан сўнг плей-офф йўлланмаси учун имкониятни бой берган «Шанхай Шенхуа» 8-турда турнир билан хайрлашиш олдидан иродали якун қилишга уриниб кўрди. Бироқ Леонид Слуцкий жамоаси «Бурирам Юнайтед»га қарши ўйинда буни уддалай олмади. Бу ҳақда euro-football.ru хабар беради.
Таиланд клуби учрашув тақдирини тез ҳал қилди: биринчи бўлимнинг дастлабки дақиқаларида кетма-кет икки гол урилиб, ҳисоб 2:0 кўринишини олди. 11-дақиқада Гуд Кёртис, 22-дақиқада эса Муеанта Супханат гол муаллифи бўлди.
Кўп ўтмай «Шанхай Шенхуа»нинг бир футболчиси четлатилиб, майдонда бир киши кам қолиб кетди. Шу ҳолат интриганинг деярли барҳам топишига сабаб бўлди ва ҳисоб ўзгармади — 0:2.
Қайд этиш жоиз, Леонид Слуцкийнинг «Шанхай Шенхуа» билан амалдаги шартномаси 2027 йил охиригача мўлжалланган.