Урбиг Нойер билан рақобат уни янада кучайтишини айтди
Мюнхеннинг «Бавария» клубида заҳира дарвозабон Йонас Урбиг яна асосий таркибда майдонга тушишга яқин. Мануэл Нойер жароҳат сабаб сафдан чиққанлиги учун, Урбиг гранд жамоа дарвозасини қўриқлаши кутилмоқда. Бу ҳақда euro-football.ru хабар беради.
Урбиг мавсум давомида бир неча бор имкониятдан унумли фойдаланиб, керакли паллада жамоани муносиб тарзда суғурталай олишини кўрсатган. Дарвозабоннинг таъкидлашича, у «Бавария»даги тажрибали шеригидан кўп нарсани ўрганмоқда.
«Ундан жуда кўп сабоқ оляпман. Қолаверса, таркиб учун шундай кучли рақобатчининг борлиги энг катта туртки беради», — дея Урбиг сўзларини келтиради derbyderbyderby.it.
Ҳозир «Бавария» Бундеслигада турнир жадвалида ишончли тарзда пешқадамлик қилмоқда. Дам олиш кунлари клуб навбатдаги тур доирасида «Айнтрахт»ни ўз майдонида қабул қилади.