Венсан Компани Гвардиоладан олган сабоқларини айтди

"Бавария" бош мураббийи Венсан Компани Хосеп Гвардиола билан ишлаган давридан нималарни ўрганганини маълум қилди. Белгиялик мутахассис аввалроқ "Манчестер Сити"да испаниялик мураббий қўл остида ўйнаган. Бу ҳақда euro-football.ru хабар беради.

Компани таъкидлашича, Гвардиоладан энг катта ўзлаштирган жиҳати тактика эмас, балки менталитет: ҳар доим ғалаба учун интилиш, ҳар бир учрашувни бирдек муҳим қабул қилиш ва асосий рақиб билан ўйин ҳамда қуйи дивизион жамоасига қарши баҳс ўртасида фарқ қилмаслик. Унинг фикрича, айнан шундай ёндашув жамоага суръатни ҳеч қачон пасайтирмасликка ёрдам беради.

Венсан Компани "шаҳарликлар" сафида 2008 йилдан 2019 йилгача тўп сурган. Хосеп Гвардиола эса "Манчестер Сити"ни 2016 йилдан бери бошқариб келмоқда. Компани "Бавария"даги ишини 2024 йил ёзида бошлаган.