Арне Слот Руни айтган «Ливерпул аураси»га жавоб қайтарди
«Ливерпул» бош мураббийи Арне Слот Уэйн Руни томонидан билдирилган фикрларга муносабат билдирди. Бу ҳақда euro-football.ru хабар беради.
«Манчестер Юнайтед»нинг собиқ ҳужумчиси Руни нидерландиялик мутахассисда «Ливерпул аураси» етишмаётганини айтди. Шу билан бирга, у бундай таассурот Юрген Клопп билан доимий қиёслашлар фонида пайдо бўлиши мумкинлигини ҳам тан олди.
Слот эса одамларни солиштириш ҳар кимнинг ҳуқуқи эканини таъкидлади, бироқ буни ҳар доим ҳам адолатли деб бўлмаслигини қўшимча қилди. Мураббий Клопп билан уни бирлаштирадиган асосий жиҳат — иккаласи ҳам чемпионликни қўлга киритгани эканини айтди.
«Ўйлайманки, мураббий қанча кўп ғалаба қозонса, унинг ‘аураси’ ҳам шунча кучлироқ бўлади. Бу муҳим. Юргеннинг ўзига хос аураси борлиги рост, лекин мен ўзим ҳақимда буни четдан туриб баҳолай олмайман. Ғалаба қозонадиган мураббий — аурали мураббий», — деди Слот матбуот анжуманида.
Якшанба куни «қизиллар» АПЛ доирасида сафарда «Ноттингем Форест»га қарши баҳс олиб боради.