Зидан мундиалдан кейин Франция термасини бошқариши мумкин экан

«Реал»нинг собиқ бош мураббийи Зинедин Зидан ҳақидаги навбатдаги катта гап-сўзлар яна авж олди. Журналист Фабрицио Романо айтишича, жаҳон чемпионатидан кейин Зидан Франция миллий жамоаси бош мураббийи лавозимига келиш эҳтимоли бор ва бу борада Франция футбол федерацияси билан оғзаки келишув ҳам мавжуд.

Романо бу мавзудаги муҳокамаларни тушунтирар экан, Зидан атрофида доим «Реал» ёки бошқа топ-клублар билан боғлиқ миш-мишлар айланишини эслатган. Хусусан, декабрь ойида ҳам уни Мадрид клубига қайтиши мумкинлиги ҳақида турли хабарлар чиққан. Бироқ Романонинг фикрича, «Реал»даги эҳтимолий ўзгаришлар сценарийсида бошқа номзодлар ҳам бор: у агар Хаби Алонсо кетса, клуб тизимида ишлаб келаётган Арбелоа варианти кўпроқ мантиқий бўлишини айтган ва ҳозир ҳам Арбелоа клуб структурасида қолмоқда.

Зидан масаласида эса Романо асосий нуқтани очиқ айтган: унинг Франция термасини мундиалдан кейин қабул қилиб олиши бўйича оғзаки келишув бор. Ҳозирча эса барча диққат амалдаги бош мураббий Дешам билан жаҳон чемпионатига тайёргарликка қаратилгани урғу қилинган.

Шу ерда Романо яна бир муҳим жиҳатни таъкидлайди: федерация ҳам, футболчилар ҳам, Дешамнинг ўзи ҳам ҳурматга лойиқ позицияда. Олдинда улкан турнир турган пайтда “мураббийлик ўрни бўшатиляпти” деган кайфият яратиш ҳеч кимга керак эмас. Аммо кутилма шуки, мундиал тугагач, Зидан яна мураббийлик фаолиятига қайтиб, миллий жамоани бошқариши мумкин.

Бироқ, Романо ўзи ҳам охирида тормозни босиб қўяди: бу ҳозирча фақат оғзаки гаплар даражасида. Футболда айниқса мураббийлар мавзусида “100 фоиз аниқ” деган нарса кам учрайди — вазият бир кунда ўзгариб кетиши мумкин.

Маълумот учун, 53 ёшли Зинедин Зидан 2021 йил июнь ойида «Реал» бош мураббийлиги билан хайрлашган ва шундан бери бош мураббий сифатида расмий иш бошламаган. Шунинг учун ҳам унинг қайтиши ҳақидаги ҳар қандай сигнал футбол оламида тезда катта шов-шувга айланяпти.