Экспертлар Ҳусанов ва бошқа футболчилар ҳаракатларини қандай баҳолади?
Англия Премьер-лигасининг 27-турида “Манчестер Сити” ўз мухлислари қаршисида “Ньюкасл Юнайтед”ни 2:1 ҳисобида енгиб, чемпионлик пойгасида яна бир муҳим қадам ташлади. Ушбу ғалабадан кейин Хосеп Гвардиола шогирдлари лига пешқадами “Арсенал” билан орадаги фарқни икки очкогача қисқартиришга муваффақ бўлди.
Учрашувда эътибор марказида бўлган жиҳатлардан бири — Ўзбекистон миллий терма жамоаси ҳимоячиси Абдуқодир Ҳусановнинг иккинчи таймдаги чиқиши бўлди. У танаффусдан кейин Рубен Диаш ўрнига майдонга тушди ва “Ньюкасл”нинг тезкор ҳамда ўткир қарши ҳужумларини бартараф этишда жонбозлик кўрсатиб, “Сити” ҳимоясида тартибни тиклашга катта ҳисса қўшди.
Нуфузли манба ҳисобланган esteemedkompany.com сайти экспертлари “Манчестер Сити” футболчиларининг ҳаракатларини баҳолаб чиқди. Қуйида уларнинг фикрлари асосида ўйин манзарасига яна бир бор назар ташлаймиз.
Жанлуижи Доннарумма — 7,5/10
Гол ўтказилган эпизодда дарвозабондан мўъжиза кутиш қийин эди. Шунга қарамай, у бир неча муҳим сейвларни амалга оширди. Энг асосийси, Доннарумма бу сафар тўпни оёқ билан ўйнашда анча ишончли ва таъсирли кўринди — босим остида ҳам хотиржам қолди.
Матеуш Нуньеш — 6/10
Бу беллашувда Нуньеш ўз ишини бажарди, позициясини йўқотмади, аммо кўзга яққол ташланадиган бирор “ўткир” иши билан ажралиб чиқмади.
Рубен Диаш — 6/10
Диашнинг ўйини мураббийлар штабига тўлиқ маъқул келмади. Унинг устига сариқ карточка ҳам олиб қўйди. Натижада танаффусда Ҳусанов билан алмаштирилди — ва бу қарор ўйин тақдирига таъсир қилган ҳаракатлардан бири бўлди.
Марк Гехи — 7/10
Учрашув бошидаги бироз асабий лаҳзалардан кейин у ҳимояда анча мустаҳкам кўринди, позицион ҳаракатларда ўзини тўғри тутди.
Райан Айт-Нури — 7/10
Айниқса ўйин аввалида ҳужумларга яхши уланди. Бироқ унинг асосий плюси — бутун баҳс давомида ҳимояда барқарор ва интизомли ўйнагани бўлди.
Родри — 8,5/10
Родри бугун ҳам “Сити”нинг плеймейкери эканини исботлади. Майдондаги лидерлиги, тўп назорати, қарор қабул қилиш тезлиги жамоа ғалабасида ҳал қилувчи аҳамият касб этди.
Бернарду Силва — 6,5/10
Энг юқори даражадаги ўйини эмас, лекин Бернарду доимгидек “кўринмас меҳнат” қилди: босим, қайта тўп олиш, позиция алмашиш — барчаси жамоага хизмат қилди.
Нико О’Райли — 9/10
Шубҳасиз, баҳс қаҳрамони. Дубл қилди, жамоани олға етаклади ва энди у “Сити” учун шунчаки ёш истеъдод эмас — реал таянч футболчилардан бирига айланиб бораяпти.
Антуан Семеньо — 6/10
Ўйиннинг ритмини ўзгартириши мумкин эди, аммо зарбаларда аниқлик етишмади. Тўпга эгалик қилишда ҳам баъзида бепарволик қилди — “Ньюкасл”га қарши бундай хатолар кечирилмайди.
Умар Мармуш — 7/10
Голли узатма муаллифи бўлди, алмаштирилгунига қадар фаол ҳаракат қилди. Ундан ҳужумда янада кўпроқ кескинлик кутса бўлади.
Эрлинг Холанд — 8,5/10
О’Райлига голли пас берди. Умуман, Холанд бугун жуда ёрқин ўйнади: ҳужумда фойдали, ҳимояда ҳам жамоага ёрдам берди. Етакчи бўлиш нима эканини амалда кўрсатди.
Абдуқодир Ҳусанов — 7,5/10
Майдонга тушгач, Ҳусанов “ўйинни йиғиб” берди. Унинг тезлиги, яккакурашлардаги қатъийлиги “Ньюкасл”нинг қарши ҳужумдаги шиддатини пасайтиришда жуда қўл келди. Айниқса, тезкор жамоаларга қарши ўйинларда Абдуқодирнинг жисмоний тайёргарлиги “Сити” учун алоҳида плюс бўлиб турибди.
Райан Шерки — 7/10
Яратган вазиятлари голга айланганида, натижа янада ишончли кўриниш олиши мумкин эди. Босим остида ҳам хотиржам қарор қабул қилиши мутахассислар эътиборини тортди.
Энди “Манчестер Сити” Премьер-лигадаги навбатдаги баҳсини 28 февраль куни сафарда “Лидс”га қарши ўтказади. Чемпионлик пойгаси қизишган пайтда ҳар бир очко олтин — “Сити” эса бу олтинларни йиғишни жуда жиддий бошлади.