«Ювентус» ҳужумчиси Йилдиз «Галатасарай»га қарши жавоб учрашувини ўтказиб юбориши мумкин
«Ювентус» ҳужумчиси Кенан Йилдиз А Сериянинг «Комо»га қарши кечган сўнгги ўйинида жароҳат олди. Туринликлар ушбу баҳсда 0:2 ҳисобида мағлуб бўлди. Бу ҳақда euro-football.ru хабар беради.
Corriere dello Sport хабарига кўра, туркиялик футболчида чап болдир мушаги шикастланиши аниқланган. Шу боис унинг 25 февраль куни бўлиб ўтадиган Чемпионлар лигаси плей-оффининг биринчи босқичи доирасида «Галатасарай»га қарши жавоб ўйинида майдонга тушиши номаълумлигича қолмоқда.
Йилдиз 2022 йилда «Бавария»дан эркин агент сифатида «Ювентус» сафига келиб қўшилган. Ҳужумчининг шартномаси 2030 йил 30 июнгача амал қилади. Жорий мавсумда у барча мусобақаларда 35 учрашувда қатнашиб, 9 та гол урди ва 8 та голли узатма берди.