Страсбур ултралари баннерлар сабаб трибунда муштлашиб кетди
Франция чемпионатининг 23-турида «Страсбур» «Лион»ни 3:1 ҳисобида енгган учрашувда «Стад де ла Мено» стадионида тартибсизликлар юз берди. Бу ҳақда euro-football.ru хабар беради.
L’Equipe хабарига кўра, можаро ўта ўнг қарашларни тарғиб қилувчи шиорлар ёзилган баннерлар трибуна бўйлаб ёйилгани ортидан келиб чиққан. Бу баннерларни ўзини мустақил деб атаган бир гуруҳ шахслар, жумладан, сентябр ойида Франция ҳукумати томонидан тарқатиб юборилган Offenders хулиганлар гуруҳининг собиқ аъзолари ҳам олиб кирган.
Стюардлар баннерларни тезда олиб ташлаганига қарамай, жанжалнинг олди олинмади. Трибунда бундай мазмундаги баннерларга қарши чиқадиган UB90 вакиллари тартиб бузганлар билан тўқнашиб кетди.
Видеокузатув ёзувлари аллақачон ҳуқуқ-тартибот органларига топширилган, ҳолат юзасидан текширув давом этмоқда. Дастлабки маълумотларга кўра, жабрланганлар йўқ.