Чемпионлар лигасидаги омадсизликдан кейин «Интер» Кивуга маош оширади
«Интер» Чемпионлар лигасида кутилган натижани бера олмади. Милан клуби плей-офф босқичидаёқ турнир билан хайрлашди: «Буде-Глимт»га сафарда 1:3, уйда эса 1:2 ҳисобида ютқазди. Бу ҳақда euro-football.ru хабар беради.
Шунга қарамай, клуб раҳбарияти бош мураббий Кристиан Кивунунг ишидан мамнун. Журналист Николо Скиранинг ижтимоий тармоқлардаги хабарига кўра, Киву билан шартномани узайтириш бўйича келишув яқин: янги битим 2028 йил ёзигача мўлжалланган бўлиб, яна бир мавсумга чўзиш бандини ҳам ўз ичига олади.
Қайд этилишича, ҳужжатлар имзолангандан сўнг, Кивунунг маоши ҳам оширилади.
Киву «Интер»ни ўтган ёзда қабул қилиб олганди. Жамоа А Серияда ишончли пешқадам бўлиб турибди ва иккинчи ўриндаги «Милан»дан 10 очко олдинда бормоқда.