Жикия майдонга тушмагани жароҳати билан боғлиқ экан
Туркиянинг "Антальяспор" клубида тўп сураётган россиялик ҳимоячи Георгий Жикиянинг агенти Малик Арутюнов футболчининг сўнгги пайтлардаги ўйин амалиёти камлигига изоҳ берди. Бу ҳақда euro-football.ru хабар беради.
Агентнинг айтишича, Жикия жароҳатдан тўлиқ фориғ бўлган ва жамоага яқинда келган янги бош мураббий ҳам ҳимоячига ишонч билдирмоқда.
Арутюнов "Чемпионат" нашрига берган фикрида Жикияни "Фенербахче"га қарши учрашувда асосий таркибда кўриш эҳтимоли юқорилигини таъкидлади. Унинг сўзларига кўра, клубда аллақачон учинчи мураббий алмашган ва ҳар бирининг футболчидан фойдаланиш бўйича ўз қараши бор, Жикиянинг ўйнамагани эса айнан жароҳат билан боғлиқ бўлган.
2025/2026 йилги мавсумда Жикия Туркия чемпионати ва кубоги доирасида 13 та ўйинда майдонга тушиб, 2 та гол урди.