Улуғбек Йўлчиев ва Жасур Умиров куйлаган дуэт нега премьера қилинмади?

“Омон-омон” дастурининг навбатдаги сонида бир неча хит қўшиқлари билан танилган хонанда Улуғбек Йўлчиев меҳмон бўлди. Суҳбат давомида санъаткордан аввал куйланган, аммо премьера қилинмаган дуэт ҳақида сўралди.

Маълум бўлишича, Улуғбек Йўлчиев Жасур Умировнинг концертида у билан дуэт ижро этган. Қўшиқ ёзиб олинган бўлса-да, якунда премьера қилинмаган ва айрим лавҳалар кесиб ташланган.

Хонанданинг айтишича, ушбу вазият кичик тушунмовчилик сабаб юзага келган. “Тўғри, очиқчасига айта қоламиз. Жасур Умировнинг концертида дуэт куйлаганмиз, овозлар ҳам ёзилган. Шунда Жасур Умиров менинг расмимни сўраган, ёқса чиқарамиз деган. Мен ҳазил тариқасида сенга ёқмай қўя қолсин расмим, деганман. Бўлди, шундан кейин гаплашмаганмиз ҳам”, дея изоҳ берди Улуғбек Йўлчиев.

Санъаткорнинг ушбу баёноти ижтимоий тармоқларда ҳам муҳокамаларга сабаб бўлди. Мухлислар эса икки хонанданинг ҳамкорлиги барибир бир кун келиб расман тақдим этилишига умид билдирмоқда.