Руджери Каванига футболни тарк этишни маслаҳат берди
Уругвайлик ҳужумчи Эдинсон Кавани Аргентинадаги фаолиятида жиддий босимга дуч келмоқда: “Бока Хуниорс” мухлислари уни тез-тез ҳуштакбозлик билан қарши олмоқда. Кўп ҳолатларда футболчи майдонга тушмаяпти ёки ўйин охиригача қолмай, муддатидан аввал алмаштирилмоқда. Бу ҳақда euro-football.ru хабар беради.
Аргентина футболининг собиқ юлдузи Оскар Руджери бу вазиятни Каванининг обрўсига нисбатан ҳурматсизлик деб баҳолади. Унинг фикрича, бундай муносабат давом этаётган экан, тажрибали форвард футболни якунлагани маъқул.
“Бундай ютуқларга эга футболчи учун бу ҳақорат. Шундай бўлгандан кўра, футболни бас қилгани яхшироқ”, — дея Руджерининг сўзларини derbyderbyderby.it келтирди.
Эслатиб ўтамиз, Кавани аввалроқ “Наполи”, “ПСЖ” ва “Манчестер Юнайтед” каби клубларда ҳам тўп сурган.