Кейн дублидан кейин Левандовски рекордига изоҳ берди
Мюнхеннинг «Бавария» клуби ҳужумчиси Гарри Кейн навбатдаги ўйиндан сўнг Роберт Левандовскининг Бундеслигадаги рекордига доир саволларга яна жавоб қайтарди. Бу ҳақда euro-football.ru хабар беради.
Поляк форварди 2020/21 йилги мавсумда «Бавария» сафида Бундеслигада 41 та гол уриб, тарихий натижа қайд этган. Шанба куни Кейн Дортмунднинг «Боруссия»сига қарши учрашувда дубл муаллифига айланди ва чемпионат якунига ўн тур қолганида унинг ҳисобида 30 та гол бор.
«Биламан, ҳар бир ўйиндан кейин Левандовски рекорди ҳақида сўрашади. Лекин олдинда ҳали кўп учрашув бор, барқарорликни сақлаш керак. Апрел охирида буни қанчалик амалга ошириш мумкинлигини кўрамиз», — деди 32 ёшли инглиз ҳужумчиси.
Дортмунддаги баҳсда «Бавария» 3:2 ҳисобида ғалаба қозонди. Венсан Компани бошчилигидаги жамоа турнир жадвалида «асаларилар»дан ортда қолаётган рақиблари билан фарқни 11 очкогача оширди.