Галатасарай ва Фенербаҳче футболчиларини ставка учун қамоқ кутмоқда
Туркиянинг икки гранди — Галатасарай ва Фенербаҳче сафидаги футболчилар ноқонуний ставкалар билан боғлиқ иш бўйича қамоқ жазоси хавфи остида қолмоқда. Бу ҳақда euro-football.ru хабар беради.
Гап Галатасарай вакили Метехан Балтажчи ҳамда Фенербаҳченинг сардори Мерт Ҳакан Яндаш ҳақида кетмоқда. Маҳаллий қонунчилик доирасида Балтажчи 13 йилгача, Яндаш эса 17 йилгача озодликдан маҳрум этилиши мумкин.
Sabah нашри маълумотига кўра, Балтажчи камида икки марта Галатасарай ўйинларига пул тиккан. У ўша учрашувларда асосий таркибдан жой олмаган бўлса-да, жамоа қайдномасига киритилган — бу ҳолат футболчининг ўйин натижасига таъсир ўтказиш эҳтимолини оширади.
Амалдаги турк қонунларига кўра, у букмейкерларга профессионал спортчи эканини олдиндан маълум қилиши шарт эди, бироқ футболчи бу талабни бажармаган.