Доҳада 48 нафар ўзбекистонлик рейси бекор бўлиб, аэропортда қолиб кетди

Яқин Шарқдаги сўнгги воқеалар муносабати билан Қатарда бўлиб турган қарийб 600 нафар Ўзбекистон фуқароси орасида жабрланганлар аниқланмаган. Бу ҳақда Ўзбекистоннинг Доҳадаги элчихонаси хабар берди.

Маълум қилинишича, 28 февраль куни Қатар ҳаво ҳудуди вақтинча ёпилгани сабаб Тошкентга қайтиши керак бўлган 48 нафар ўзбекистонлик Доха аэропортида қолиб кетган. Фавқулодда ҳолат туфайли авиакомпаниялар йўловчиларни меҳмонхона билан таъминлай олмаган.

Шу шароитда элчихона ходимлари зудлик билан аэропортга етиб борган. Олиб борилган музокаралар натижасида фуқаролар, шу жумладан ижтимоий тармоқлар орқали ёрдам сўраган ватандошлар вақтинчалик меҳмонхоналарга жойлаштирилган.

Элчихона маълумотига кўра, Қатар ҳаво ҳудуди очилиб, парвозлар қайта тикланиши билан фуқароларнинг Ватанга хавфсиз қайтиши таъминланади. Вазирият элчихонанинг доимий назоратида экани, йўловчилар рўйхати мунтазам янгиланиб борилаётгани айтилган.

Шунингдек, дипломатик ваколатхона ўзбекистонликларни саросимага тушмасликка, фақат расмий манбаларга ишонишга ҳамда хавфсизлик учун одамлар гавжум жойлардан тийилиб, маҳаллий қонун-қоидаларга амал қилишга чақирган.

Мурожаат учун элчихона консули Отабек Муратов билан (+974 5141 1001) боғланиш мумкинлиги маълум қилинган.