«Галатасарай» ва «Фенербахче» футболчиларини ставкалар учун қамоқ кутмоқда
Туркия футболида шов-шувли ҳолат: «Галатасарай» ва «Фенербахче» сафида тўп сураётган икки футболчи тикишлар билан боғлиқ иш бўйича қамоқ жазосига тортилиши мумкин. Бу ҳақда euro-football.ru хабар беради.
Гап «Галатасарай» вакили Метехан Балтаджи ҳамда «Фенербахче» сардори Мерт Ҳакан Яндаш ҳақида кетмоқда. Биринчи футболчига 13 йилгача, иккинчисига эса 17 йилгача озодликдан маҳрум этилиш хавфи бор.
Sabah нашри хабарига кўра, Балтаджи камида икки марта «Галатасарай» ўйинларига ставка қўйган. У айрим учрашувларда асосий таркибда бўлмаган, бироқ жамоа қайдномасига киритилган — бу эса футболчига натижага билвосита таъсир ўтказиш имконини бергани таъкидланмоқда.
Амалдаги Туркия қонунчилигига кўра, спортчи букмейкерларга профессионал футболчи эканини маълум қилиши шарт бўлган, аммо у буни бажармагани қайд этилмоқда.