Тиббиёт йўналиши бўйича супер контракт бекор қилиниши кутилмоқда
Тиббиёт йўналиши бўйича супер контракт бекор қилиниши кутилмоқда. Бундан ташқари, одатий контракт миқдорини кескин кўтаришмоқчи, ҳақиқий харажатлар миқдоридан келиб чиқиб, сўзлари замирида айнан шу ғоя ётибди.
Лекин бу масала атрофида жамоатчилик фикри бир хил эмас: турлича муносабатлар пайдо бўлмоқда. Айримлар қарор лойиҳасига қарши чиқиб, аксинча оширилган тўлов-контракт сақланиб қолиши, ҳатто унинг миқдори оширилиши керак, деган фикрни билдирмоқда. Уларга кўра, айнан шу йўл билан тушадиган қўшимча маблағлар ОТМларни молиявий жиҳатдан анча мустақил қилиши, таълим сифати ва инфратузилмани яхшилашга хизмат қилиши мумкин.
Шу билан бирга, “тўлов қанчалик юқори бўлишидан қатъи назар, талабадан натижа сўраш керак” деган кескин қараш ҳам учрайди. Яъни муҳокама фақат пул атрофида эмас — таълимда талабчанлик, холис баҳолаш ва адолат тамойиллари масаласи ҳам кун тартибига чиқяпти.
Энг катта хавотир эса одатий тўлов-контракт миқдорининг ошиши билан боғлиқ. Чунки нарх кескин кўтарилса, бу жамоатчиликда норозилик кайфиятини кучайтириши мумкин: моддий аҳволи оғир оилалар фарзандлари 6–7 йил давомида йиллик 30 млн сўм атрофидаги тўловни тўлашга қийналади. Натижада тиббиёт каби муҳим соҳага кириш имконияти оддий оилалар учун янада чекланиб қолиш хавфи пайдо бўлади.