Тошкент вилоятида банкоматни бузишга уринган эркак 4 дақиқада қўлга олинди
Тошкент вилояти Нурафшон шаҳрида 2 март куни банкоматни бузиб, ичидаги пулларни олиб кетишга уринган шахс тезкор равишда қўлга олинди. Бу ҳақда вилоят Ички ишлар бош бошқармаси ахборот хизмати маълум қилди.
Хабарга кўра, тунги соат 03:10 да “Оппоқ” МФЙ, Тошкент йўли кўчасидаги банкомат қурилмасидан хавф сигналини берган ташвиш хабари Қўриқлаш бошқармасига келиб тушган. Огоҳлантириш навбатчилик қисми орқали дарҳол тунги тезкор гуруҳга узатилган.
Ходимлар воқеа жойига бор-йўғи 4 дақиқада етиб бориб, атроф-муҳитни текширишга киришган. Кузатув ва текширув давомида банк шохобчаси ҳудудида бўлган шахс ушланган.
Унинг ёнидан болға, отвертка ҳамда бошқа хўжалик асбоб-ускуналари топилган. Дастлабки маълумотларга кўра, у банкомат эшигини мажбуран очиб, пулларни ўғирлашни режалаштирган.
Тезкор чора-тадбирлар натижасида Ўрта Чирчиқ туманида яшовчи, 1994 йилда туғилган фуқаро воқеа жойидаёқ қўлга олинган. Айни ҳолат юзасидан ҳудудий ИИБ томонидан терговга қадар текширув ишлари олиб борилмоқда.