Доналд Трамп Эрон билан урушнинг тўртта асосий мақсадини очиқлади

Оқ уй раҳбари Доналд Трамп Яқин Шарқдаги кескин вазият бошланганидан буён илк бор камералар қаршисида кўриниш берди. Унинг жонли эфирдаги шов-шувли нутқи дунё нигоҳини яна бир бор Теҳрон ва Вашингтон ўртасидаги тўқнашувга қаратди. Zamin.uz нашри АҚШ президентининг ушбу тарихий баёнотидаги энг муҳим нуқталарни тақдим этади.

Шу пайтгача фақат ижтимоий тармоқлар ва телефон орқали муносабат билдириб келган Трамп, бу гал журналистлар билан юзма-юз мулоқот қилди. У ўз нутқида ҳарбий амалиётнинг зарурлигини Эроннинг ядровий интилишлари ва яқинлашиб келаётган ракета хавфи билан изоҳлади.

Нега айнан ҳозир?

Трампнинг таъкидлашича, Эрон Оқ уйнинг жиддий огоҳлантиришларини писанд қилмай, нафақат Европа, балки Американинг асосий ҳудудларига етиб бора оладиган қуролларни яратиш арафасида бўлган. Бироқ, Reuters агентлиги экспертлари президентнинг бу даъволарини бироз бўрттирилган деб ҳисобламоқда. Разведка маълумотларига кўра, Эрон бундай салоҳиятга камида 2035 йилга бориб эга бўлиши мумкин эди.

АҚШнинг Эрондаги 4 та стратегик режаси

Президент ўз маъмурияти олдига қўйган тўртта устувор вазифани санаб ўтди:

1. Ракета қудратини синдириш: Эроннинг ҳужумкор ракета салоҳиятини бутунлай йўқ қилиш.

2. Денгиз флотига зарба: Ислом республикасининг ҳарбий кемаларини яксон этиш.

3. Ядровий тўсиқ: Теҳроннинг ядро қуролига эга бўлиш йўлини бутунлай ёпиш.

4. Молиявий блок: Хориждаги турли гуруҳларни қуроллантириш ва молиялаштиришга чек қўйиш.

Қизиқарли жиҳати шундаки, The New York Times нашри Трампнинг нутқида "режимни ўзгартириш" ҳақида сўз бормаганига эътибор қаратди. Бу эса Вашингтоннинг якуний мақсадлари ҳали ҳам ноаниқ эканидан далолат бериши мумкин.

Уруш қанча давом этади?

Операция муддати ҳақидаги саволларга Трамп ўзига хос услубда жавоб қайтарди. "Биз аввалдан 4-5 ҳафталик муддатни прогноз қилгандик ва ҳозир режадан анча олдиндамиз. Агар керак бўлса, янада узоқроқ давом эттирамиз. Кимдир мени зерикиб қолади деб ўйласа, адашади. Бизда дунёнинг энг қудратли армияси бор ва биз барибир ғалаба қозонамиз", — деди у.

Президент шунингдек, Эронга қарши "катта ҳужумлар тўлқини" ҳали олдинда эканини ва зарур бўлса, қуруқлик қўшинларини киритишдан ҳам қайтмаслигини қистириб ўтди.

Сизнингча, Доналд Трамп айтган 4-5 ҳафталик муддатда Яқин Шарқдаги ушбу можарони якунлашнинг имкони борми?