Тиббиёт олийгоҳларида супер контракт бекор қилиниши мумкин
Ўзбекистондаги тиббиёт олий таълим муассасаларида қабул тизимини ислоҳ қилиш бўйича муҳим янгиликлар кутилмоқда. Хусусан, келгуси ўқув йилидан бошлаб тиббиёт йўналишларида супер-контракт тизимини бутунлай бекор қилиш таклиф этилмоқда. Бу ўзгариш абитуриентлар ва уларнинг ота-оналари учун катта енгиллик яратиши кутилмоқда.
Шунингдек, таълим жараёнида ҳам янги тартиб жорий этилиши режалаштирилган. Унга кўра, "умумий тиббиёт" йўналишида 5+1 шаклидаги 6 йиллик ўқиш тизими йўлга қўйилади. Бу талабаларнинг амалий кўникмаларини янада мустаҳкамлашга хизмат қилади.
Бундан ташқари, давлат имтиҳонларида ўтиш баллари бўйича ҳам янги талаблар белгиланмоқда. Эндиликда шифокор мутахассисликлари учун минимал ўтиш бали 70 фоиз, ўрта бўғин тиббиёт ходимлари учун эса 60 фоиз этиб белгиланиши кўзда тутилган. Мазкур чоралар тиббий таълим сифатини ошириш ва соҳада юқори малакали кадрларни тайёрлашга қаратилган.