Жасорат кўрсатган марҳум инспектор оиласи уй билан таъминланди
Тошкент шаҳрида хизмат бурчини бажариш чоғида ҳалок бўлган йўл-патрул хизмати инспектори Ҳосилбек Эшназаровнинг оиласи давлат эътиборига олинди. Хизмат вазифасини ўташ вақтида вояга етмаган шахс бошқарувидаги автомобиль уриб кетиши оқибатида вафот этган ходимнинг яқинларига пойтахтдан янги хонадон калитлари топширилди.
Ички ишлар вазирлиги раҳбарияти иштирокида ўтказилган тантанали тадбирда марҳум кичик сержант Ҳосилбек Эшназаровнинг кўрсатган жасорати алоҳида эътироф этилди. Йиғилишда ходимнинг отасига давлатимиз раҳбари фармони билан берилган “Жасорат” медали тантанали равишда топширилди. Ушбу тадбирда марҳумнинг онаси, турмуш ўртоғи ва фарзандлари ҳам иштирок этишди.
Эслатиб ўтамиз, Тошкент шаҳар ИИББ ЙҲХБ инспектори бўлган Ҳосилбек Эшназаров жорий йилнинг 3 март куни ўз хизмат вазифасини бажариш чоғида ҳалок бўлган эди. Унинг кўрсатган мардлиги ва фидойилиги давлатимиз томонидан юксак баҳоланиб, вафотидан сўнг “Жасорат” медали билан мукофотланган эди.