Роналду таъсири «Алмерия» обуначилари сонини оширди
Испания футболининг иккинчи дивизиони вакили бўлган "Алмерия" клуби ижтимоий тармоқларда мисли кўрилмаган натижани қайд этди. Жамоанинг Instagram саҳифасидаги обуначилар сони 3 миллиондан ошиб кетди ва бу кўрсаткич билан клуб Испаниянинг энг машҳур 5 та жамоаси рўйхатидан жой олди.
Клубнинг бундай тезкорлик билан оммалашиб кетишига португалиялик юлдуз футболчи Криштиану Роналду сабабчи бўлди. Жорий йилнинг февраль ойида "Ан Наср" ҳужумчиси "Алмерия" акцияларининг 25 фоизини сотиб олиб, клуб эгаларидан бирига айланган эди. Айнан шу воқеадан сўнг мухлислар ва футбол ишқибозларининг жамоага бўлган қизиқиши кескин ортди.
Айни дамда "Алмерия" ўзининг ижтимоий тармоқлардаги аудиторияси билан 3,7 миллион обуначига эга "Севилья" клубини ортда қолдириш арафасида турибди. Испания футболида эса Instagram тармоғида энг кўп обуначига эга клублар рўйхатини "Реал Мадрид" бошқариб бормоқда. Мадридликларнинг 181 миллион, "Барселона"нинг 146 миллион ҳамда "Атлетико"нинг 18 миллион обуначиси мавжуд.