«Real Madrid» клуби 124 ёшга тўлди
Бугун футбол оламидаги энг буюк ва муваффақиятли жамоалардан бири бўлган "Реал Мадрид" ўзининг 124 йиллик юбилейини нишонламоқда. Мадридликлар нафақат Испания, балки бутун дунё футболи тарихида ўчмас из қолдирган клуб ҳисобланади. Ушбу сана клуб мухлислари учун чинакам байрамдир. Бу ҳақда sports.ru хабар беради.
"Реал Мадрид" ўз тарихи давомида кўплаб рекордларни янгилаган. Улар Чемпионлар лигаси ва Испания чемпионатида энг кўп ғолиб чиққан жамоа бўлиш билан бирга, XX асрнинг энг яхши клуби деб ҳам эътироф этилган. Айниқса, 2014 йилдан 2024 йилгача бўлган давр клуб учун олтин давр бўлди. Бу вақт оралиғида жамоа 6 марта Чемпионлар лигаси бош совринини қўлга киритди. Шунингдек, 2016 йилдан 2018 йилгача кетма кет уч марта Европа тахтига ўтирган жамоа футбол тарихида тенгсиз натижа қайд этди.
Клуб афсонаси Альфредо Ди Стефано айтганидек, "Реал Мадрид" бу шунчаки жамоа эмас, балки алоҳида бир туйғу. Бу клубни шунчаки кузатиш эмас, уни юракдан ҳис қилиш керак. Дунё бўйлаб миллионлаб мухлисларни бирлаштириб турган ушбу феномен ўзининг буюк анъаналарини давом эттирмоқда. Бугунги кунда клуб ривожига ҳисса қўшган барча инсонлар, мураббийлар ва футболчилар ушбу муваффақиятларнинг асосий ижодкорларидир.
"Реал Мадрид" келажакда ҳам янги чўққиларни забт этишда давом этишига шубҳа йўқ. Клуб ўзининг бой тарихи ва ғолиблик руҳи билан ҳамон футбол оламининг марказида қолмоқда.