Маҳкума аёллар учун масофавий таълим имконияти яратилади
Ўзбекистонда жазони ўтаётган аёлларни жамиятга мослаштириш ва уларнинг таълим олиш ҳуқуқларини таъминлаш мақсадида муҳим ташаббус илгари сурилди. Кўксарой қароргоҳида Халқаро хотин қизлар куни муносабати билан ўтказилган байрам тадбирида жиноятга қўл урган аёллар билан манзилли ишлашга қаратилган Янги ҳаёт дастури бошланиши эълон қилинди.
Ушбу дастур доирасида маҳкумалар 3 дан 6 ойгача бўлган муддатда турли касб ҳунарларга ўқитилади ва якунда махсус сертификатларга эга бўлишади. Бу уларнинг озодликка чиққандан сўнг меҳнат бозорида ўз ўрнини топишига ёрдам беради.
Энг муҳим янгиликлардан бири шундаки, эндиликда жазони ижро этиш муассасаларида сақланаётган аёллар учун олий таълим олиш имконияти кенгайтирилмоқда. Улар муассасанинг ўзида имтиҳон топшириб, олийгоҳларга кириш ва масофавий шаклда ўқиш ҳуқуқига эга бўладилар. Контракт асосида ўқишга қабул қилинган маҳкумаларга эса давлат томонидан қўллаб қувватлаш чоралари кўрилади. Хусусан, жазони ўтаб, ишга жойлашгандан сўнг қайтариш шарти билан фоизсиз ссудалар ажратилиши режалаштирилган.
Мазкур чора тадбирлар аёлларнинг таълим олишга бўлган интилишини рағбатлантириш ҳамда уларнинг жамиятга тўлақонли қайтишини таъминлашга хизмат қилади.