Ўзбекистон захиралари мисли кўрилмаган даражага чиқди
Ўзбекистоннинг олтин-валюта захиралари яна тарихий рекордни янгилади. Марказий банк маълумотларига кўра, 2026 йил 1 март ҳолатида мамлакатнинг халқаро захиралари 77,086 миллиард долларга етган. Бу 1 февралга нисбатан тахминан 2 миллиард долларга кўпдир.
Захираларнинг ўсишига асосан олтин омили кучли таъсир кўрсатган. Марказий банк статистикаси бўйича олтиннинг умумий қиймати 67,67 миллиард долларга чиққан, унинг физик ҳажми эса 13,1 миллион трой унцияга етган. Шу билан бирга, конвертация қилинадиган хорижий валюта захиралари 8,837 миллиард доллар миқдорида қайд этилган.
Ҳисоботдан кўринишича, олтин қийматининг ошиши умумий резервларни юқорига тортган асосий омиллардан бири бўлган. Хорижий қимматли қоғозлар ҳажми ҳам 1,54 миллиард доллар атрофида шаклланган.
Қисқаси, Ўзбекистон захиралари яна янги чўққига чиқди. Бу ерда асосий “локомотив” — олтин: нарх кўтарилса, статистикадаги кайфият ҳам бирдан очилиб кетяпти.