Самарқандда ярим миллиардлик сохта алкогол фош этилди
Самарқанд вилоятида йирик миқдордаги қалбаки алкогол маҳсулотларининг савдога чиқарилишига чек қўйилди. Маълум қилинишича, умумий қиймати 440 миллион сўм бўлган сохта спиртли ичимликлар аниқланган.
Бош прокуратура ҳузуридаги Департаментнинг Тойлоқ тумани бўлими ҳамда бошқа ҳуқуқни муҳофаза қилувчи органлар ходимлари ҳамкорлигида ўтказилган тезкор тадбир давомида фуқаро Б.Ф.га тегишли омборхона кўздан кечирилган. Шу жараёнда сотиш мақсадида сақлаб келинган катта ҳажмдаги маҳсулотлар фош бўлган.
Текширувда умумий баҳоси 440 миллион сўмлик, 86 турдаги жами 16 960 дона қалбаки акциз маркали алкогол маҳсулотлари борлиги аниқланган. Ушбу маҳсулотлар ашёвий далил сифатида олинган.
Мазкур ҳолат юзасидан Жиноят кодексининг тегишли моддалари билан жиноят иши қўзғатилган. Ҳозирда ҳолат бўйича тергов ҳаракатлари олиб борилмоқда.