Яқин Шарқдаги ўзбекистонликлар учун махсус Telegram бот ишга туширилди
Яқин Шарқ мамлакатларига саёҳат қилаётган ўзбекистонликларнинг хавфсизлигини таъминлаш ҳамда уларни кутилмаган нохуш вазиятлардан ҳимоя қилиш мақсадида муҳим янгилик эълон қилинди. Ўзбекистон Республикаси Туризм қўмитаси томонидан махсус @tourism_murojaat_bot Телеграм боти ишга туширилди. Бу ҳақда қўмита матбуот хизмати расмий маълумот берди.
Мазкур рақамли платформа хорижда қийин аҳволда қолган фуқароларимизга тезкор ёрдам кўрсатишга қаратилган. Эндиликда сайёҳларимиз ёки уларнинг яқин қариндошлари ушбу бот орқали ўз маълумотларини қолдиришлари мумкин. Келиб тушган мурожаатлар асосида қўмита мутахассислари фуқароларни зудлик билан ватанга қайтариш бўйича зарур чораларни кўради.
Масъуллар мурожаат қолдираётган фуқаролардан шахсий маълумотларни тўлиқ ва аниқ шаклда киритишни сўрамоқда. Бу маълумотларнинг тўғрилиги ёрдам кўрсатиш жараёнини тезлаштиришда муҳим аҳамият касб этади. Туризм қўмитаси хорижга сафар қилаётган барча ҳамюртларимизни ушбу бот ҳақида хабардор бўлишга ва зарурат туғилганда ундан фойдаланишга чақирмоқда.