UFC 326 турнири: Чарльз Оливейра BMF камари соҳибига айланди
Лас Вегас шаҳрида бўлиб ўтган UFC 326 турнири жанг санъати ихлосмандлари учун кутилмаган натижаларга бой бўлди. Кечанинг марказий жангида бразилиялик Чарлз Оливейра ҳамда америкалик Макс Холлоуэй BMF камари учун баҳс олиб боришди. Беш раунд давом этган қарама-қаршиликда ҳакамлар бир овоздан 50-45 ҳисобида ғалабани Оливейрага тақдим этишди. Жанг давомида бразилиялик спортчи рақибини партерда назорат қилиб, устунликка эришди. Бу ҳақда fighttime.ru хабар беради.
Жангдан сўнг берган интервьюсида Чарлз Оливейра навбатдаги жангини Оқ уй яқинида ўтказилиши режалаштирилган UFC турнирида ўтказишга тайёрлигини маълум қилди. Ушбу мусобақа мухлислар томонидан катта қизиқиш билан кутилмоқда.
Турнирнинг бошқа муҳим жангларида ҳам қизиқарли натижалар қайд этилди. Ярим ўрта вазн тоифасида Кайо Борральо Ренье де Риддер устидан ғалаба қозониб, ўз мавқеини тиклаб олди. Шунингдек, ёш иқтидор эгаси Раул Росас Жуниор Роб Фонтни мағлуб этиб, кетма-кет бешинчи ғалабасини тантана қилди. Собиқ чемпион Коди Гарбрандт эса Хитой вакили Сяо Лун устидан зафар қучиб, икки жанглик мағлубиятлар сериясига чек қўйди.
Қозоғистонлик Диёр Нурғожай ҳам ўз ҳисобига UFCдаги илк ғалабасини ёзиб қўйди. У Рафаэль Тобиасни ҳакамлар қарорига кўра мағлуб этишга муваффақ бўлди. Кеча давомида Дрю Добер, Грегори Родригес, Альберто Монтес ва Родольфо Беллато каби жангчилар муддатидан аввал ғалаба қозониб, мухлислар олқишига сазовор бўлишди.