Эрон олти ойлик урушга тайёрлигини ИИҚК расман маълум қилди

Яқин Шарқдаги таранглик ортиб бораётган бир пайтда Эрон ҳарбий тайёргарлиги борасида янги баёнот берилди. Мамлакат Қуролли кучлари узоқ муддатли ҳарбий тўқнашувларга тайёр экани таъкидланмоқда.

Эрон Ислом инқилоби қўриқчилари корпуси (ИИҚК) расмий вакили Али Муҳаммад Наини маълум қилишича, Эрон Қуролли кучлари камида олти ой давомида интенсив жанговар операцияларни амалга ошириш имкониятига эга.

Унинг таъкидлашича, мамлакат армияси ва ҳарбий инфратузилмаси узоқ муддатли уруш шароитида ҳам барқарор фаолият юритишга мўлжалланган. ИИҚК вакили Эрон армиясидаги захиралар, логистика тизими ҳамда ҳарбий салоҳият шундай сценарийларга мос равишда шакллантирилганини айтди.

Наинининг сўзларига кўра, Қуролли кучлар нафақат мудофаа, балки узоқ вақт давомида юқори даражадаги жанговар ҳаракатларни олиб бориш имкониятига ҳам эга. Бу эса мамлакат ҳарбий стратегиясида узоқ давом этиши мумкин бўлган эҳтимолий низолар ҳам ҳисобга олинганини кўрсатади.

Шу билан бирга, ИИҚК вакили Эроннинг ҳарбий тайёргарлиги мамлакат хавфсизлигини таъминлаш ва ташқи таҳдидларга жавоб қайтаришга қаратилганини алоҳида таъкидлади.