Уй олиш учун жамғариб бориладиган ипотека депозитлари очилади

Ўзбекистонда уй-жой сотиб олишни режалаштираётган фуқаролар учун янги имконият яратилмоқда. Президент фармонига мувофиқ, 2024 йил 1 июлдан бошлаб мақсадли ипотека депозитлари тизими синов тариқасида ишга туширилади. Бу тизим айниқса давлат субсидиясини қўлга киритган фуқаролар учун катта енгиллик бўлиб, бошланғич бадални тўплаш жараёнини осонлаштиради.

Янги тартибга кўра, субсидия ажратилиши тасдиқланган фуқаролар банкларда махсус ҳисоб рақам очишлари мумкин. Давлат томонидан ажратилган субсидия маблағлари ушбу ҳисоб рақамга бошланғич капитал сифатида ўтказиб берилади. Банклар эса ҳисобдаги қолдиқ маблағларга бозор фоиз ставкалари бўйича даромад ҳисоблаб боради. Бу фуқароларга ўз маблағларини кўпайтириш ва уй-жой учун керакли бадални тезроқ йиғиш имконини беради.

Мазкур жамғарма муддати 12 ойгача этиб белгиланган. Агар бир йил давомида уй-жой харид қилиш бўйича битим амалга ошмаса, маблағлар қайтарилади. Бунда фуқаронинг шахсий жамғармалари унинг ўзига қайтарилса, давлат субсидияси ва унга ҳисобланган фоизлар қайтадан давлат бюджетига ўтказилади. Экспериментнинг батафсил регламенти 2024 йил 1 июнга қадар тасдиқланиши кўзда тутилган. Шуни алоҳида таъкидлаш керакки, фоиз ставкаларини субсидиялаш бўйича тўловлар фақат ипотека кредити амалда берилгандан сўнггина бошланади.