Фарғонада инспекторни ёғоч билан урган фуқаро терговга тортилди
Фарғона вилоятининг Ўзбекистон туманида хизмат вазифасини бажараётган сув таъминоти ходимига ҳужум қилингани ҳақида хабарлар тарқалди. Мазкур ҳолат юзасидан жиноят иши қўзғатилгани маълум қилинди.
Маълумотларга кўра, 9 март куни “Фарғона сув таъминоти” МЧЖнинг Ўзбекистон тумани филиали инспектори Д.С. тумандаги Сочтепа кўчасида жойлашган хонадонлардан бирига текширув учун борган. Текширув жараёнида ушбу уйда рўйхатдан ўтказилмаган сув ҳисоблагичи борлиги аниқланган.
Ҳолат юзасидан тегишли ҳужжатлар расмийлаштирилаётгани ва жарима қўлланиши ҳақида маълум қилинган пайтда хонадон эгаси Фазлиддин Пардаев инспекторга қаршилик кўрсатиб, жанжал чиқарган. Можаро вақтида у ўша ерда бўлган ёғоч бўлаги билан инспекторнинг бош қисмига уриб, унга тан жароҳати етказган.
Мазкур ҳолат юзасидан Жиноят кодексининг 219 моддаси 2 қисми — ҳокимият вакилига ёки фуқаровий бурчини бажараётган шахсга қаршилик кўрсатиш бўйича жиноят иши қўзғатилган. Гумонланувчи Ф.Пардаев процессуал тартибда ушланган.
Ҳозирда мазкур иш юзасидан прокуратура органлари томонидан тергов ҳаракатлари олиб борилмоқда.