Тошкентда туннель деворининг бир қисми ўпирилиб тушди
Тошкент шаҳрида Темур Малик ва Буюк Ипак йўли кўчалари кесишмаси яқинидаги туннель йўлида тиргак деворнинг бир қисми ўпирилиб тушди. Ҳодиса юз берган ҳудудга зудлик билан авария хизматлари, техник мутахассислар ҳамда масъул ташкилотлар вакиллари етиб борган.
Воқеа жойи тезда ўраб олиниб, хавфсизлик чоралари кучайтирилди. Тошкент шаҳар ҳокимлиги маълумотига кўра, ҳозирда ҳодиса сабаблари юзасидан комплекс техник текширув олиб борилмоқда.
Мутахассислар дастлабки тахмин сифатида сўнгги кунлардаги кучли ёғингарчилик натижасида тупроқнинг ортиқча намланиши ҳамда конструкцияга тушаётган юклама ортганини кўриб чиқмоқда. Шу билан бирга, лойиҳа ечимлари, қурилиш-монтаж ишлари сифати, дренаж тизими ҳолати ва қурилиш назорати масалалари ҳам батафсил ўрганилмоқда.
Текширув якунларига кўра, туннель деворини тиклаш бўйича қарор қабул қилинади. Агар қурилиш жараёнида камчиликлар ёки қоидабузарликлар аниқланса, масъул шахсларга нисбатан қонуний чоралар кўрилиши маълум қилинди. Фавқулодда вазиятлар вазирлиги эса ҳодиса оқибатида жабрланганлар йўқлигини билдирди.