"Nexia-3"дан қарийб 5 килограмм синтетик наркотик топилди

Давлат хавфсизлик хизмати ходимлари томонидан ўтказилган тезкор тадбирда йирик миқдорда синтетик наркотик модда олиб юрилаётгани аниқланди. Маълум қилинишича, олдиндан кузатувга олинган 21 ёшли фуқаро бошқарувидаги "Nexia-3" автомобили пойтахтнинг Чилонзор туманида жойлашган "Эркин" ЙПХ масканида тўхтатилиб, текширувдан ўтказилган.

Кўздан кечириш жараёнида автомобил салонидан соф оғирлиги 4 килограмм 811 грамм бўлган "Альфа-ПВП" номли синтетик наркотик модда топилиб, ашёвий далил сифатида расмийлаштирилган.

Ушбу ҳолат юзасидан ДХХ Тергов бошқармаси томонидан гумонланувчига нисбатан Жиноят кодексининг 246 ва 273-моддалари тегишли бандлари билан жиноят иши қўзғатилиб, унга "қамоқ" эҳтиёт чораси қўлланилган.

Шу билан бирга, яна бир ҳолат Андижон вилоятида қайд этилди. ДХХ чегара қўшинлари ҳарбий хизматчилари Марҳамат туманида ўтказган тезкор тадбир давомида Бобохуросон МФЙ ҳудудида икки нафар маҳаллий фуқарони ушлади. Улар қирғизистонлик шахс томонидан чегара тўсиқлари орқали улоқтирилган қутини қабул қилиб олаётган пайтда қўлга тушган.

Текширув давомида қути ичида 9 минг 988 дона "Зардекс" номли кучли таъсир қилувчи дори воситалари борлиги маълум бўлди. Мазкур ҳолат юзасидан Жиноят кодексининг 246-моддаси 1-қисми билан жиноят иши қўзғатилиб, гумонланувчиларга нисбатан қамоқ эҳтиёт чораси қўлланди. Ҳозирда тергов ҳаракатлари давом эттирилмоқда.