Арбелоа: «Реал»нинг «Сити» устидан ғалабасига аввалдан ишонгандим
Европа футболидаги энг нуфузли клублардан бири саналган "Real Madrid" Чемпионлар лигаси 1/8 финалида Англия гранди — "Manchester City" жамоасини 3:0 ҳисобида мағлуб этди. Ушбу ғалаба нафақат мухлислар, балки мутахассислар орасида ҳам катта муҳокамаларга сабаб бўлди.
Учрашувдан кейин “қироллик клуби” бош мураббийи Alvaro Arbeloa жамоаси бундай натижага эришишига аввалдан ишонганини очиқ айтди. Унинг таъкидлашича, рақибнинг кучли таркибига қарамай, “Реал” ҳар доим катта ўйинларда ўз сўзини айта олади.
Испаниялик мутахассиснинг фикрича, “Сити”га қарши баҳсда майдонга чиққан таркиб ҳам, иккинчи бўлимда захирадан тушган футболчилар ҳам Европадаги энг юқори савияли футболчилардан бири эканини кўрсатади. Унинг сўзларига кўра, бу ерда фақат 11 нафар футболчи ҳақида эмас, балки жуда кучли ва рақобатбардош 20 нафар ўйинчига эга жамоа ҳақида гап кетмоқда.
Шу билан бирга, Арбелоа рақиб жамоа мураббийи — машҳур испаниялик мутахассис Pep Guardiola бошчилигидаги клуб сўнгги вақтларда жуда яхши формада ўйнаётганини ҳам алоҳида таъкидлади. “Сити” кетма-кет ғалабалар қайд этиб, юқори даражадаги футбол намойиш қилаётган эди.
Мураббийнинг айтишича, бу баҳс олдидан “Реал” таркибида ҳам айрим муаммолар мавжуд бўлган. Ҳал қилувчи ўйинларда жамоанинг тақдирини белгилаб бериши мумкин бўлган етакчи футболчиларидан баъзилари турли сабабларга кўра майдондан ташқарида қолган. Аммо шунга қарамай, мадридликлар ўз характерини намоён этди.
Арбелоа жамоанинг руҳий ҳолати ва ғалабага бўлган ишончи ҳал қилувчи омил бўлганини таъкидлади. Унинг фикрича, “Реал” доимо катта мақсадлар учун курашадиган ва ҳеч кимдан қўрқмайдиган клуб ҳисобланади.
“Биз — ‘Реал’. Бу жамоа ҳамма нарсага қодир. Ҳеч кимга бўй бермайди. Мен футболчиларга рақибнинг кўзига тик қарашни айтгандим ва улар айнан шундай қилди. Мен бундай гапираётган бўлсам, демак айтганларимга ишонаман. Ҳар доим ҳам тўғри чиқмаслигим мумкин, лекин баъзи пайтларда ҳақ бўлишимни кўрдингиз”, — деди испаниялик мутахассис.
Шу тариқа, мадридликлар Чемпионлар лигасидаги навбатдаги муҳим босқичга катта ишонч билан қадам ташлади. Мухлислар эса жамоанинг навбатдаги ўйинларда ҳам шундай руҳда майдонга тушишини умид қилмоқда.