Исмоилов Суперкубок финали олдидан матбуот анжуманида нималар деди?

Фотo: PFL

Ўзбекистон Суперкубоги доирасидаги финал учрашуви «Нефтчи» ва «Пахтакор» жамоалари ўртасида эртага, 15 март куни Андижондаги «Бобур арена»да бўлиб ўтади. Беллашув олдидан икки жамоа вакиллари иштирокида матбуот анжумани ташкил этилди.

«Нефтчи» бош мураббийи Исломбек Исмоилов жамоанинг финалга яхши тайёргарлик кўрганини таъкидлади. Унинг фикрича, бундай муҳим баҳсларда тактик жиҳатлардан кўра футболчиларнинг характери устунлик қилади. Исмоилов шунингдек, ҳар бир ўйинчи билан алоҳида суҳбатлар олиб бориш орқали уларга тушунтиришга ҳаракат қилаётганини айтди.

Мураббийнинг таъкидлашича, ҳар бир жамоа муҳим баҳсларда тезкор гол уришга интилади. Агар жамоа дастлабки дақиқаларда самарали гол урса, бу қўшимча мотивацияга айланади. Шу боис, «Нефтчи»нинг энг яхши футболчилари эртанги майдонда ўз салоҳиятини кўрсатишга тайёр.

Икром Алибоев эса 100 фоиз ўйинга тайёр эканини маълум қилди. Исмоилов шу билан бирга, жамоавий муҳит яхши ва кетма-кет ғалабалар футболчиларда ишончни оширганини таъкидлади.

Жамоа сардори Анваржон Ғофуров ҳам финалга тайёргарликка алоҳида эътибор қаратилганини айтди. Унинг фикрига кўра, клуб тарихида илк бор иштирок этаётган Суперкубок финали табиий ҳаяжон туғдиради, аммо жамоа яхши тайёргарлик кўрган ва майдонда ўзини намоён этишга тайёр.

Эртанги баҳс нафақат мухлислар учун катта қизиқиш, балки ҳар икки жамоа учун ҳам Суперкубокни қўлга киритиш йўлида ҳал қилувчи аҳамиятга эга.