Сербия раҳбари: Уч давлат бизга қарши ҳарбий иттифоқ тузмоқда
Сербия президенти Александр Вучич Хорватия, Албания ва Косово ўртасида тузилган янги мудофаа ҳамкорлиги Сербияга қарши қаратилган бўлиши мумкинлигини айтди.
Унинг таъкидлашича, 2025 йил 18 март куни Албаниянинг Тирана шаҳрида ушбу уч давлат ўртасида мудофаа соҳасида ҳамкорлик тўғрисидаги уч томонлама декларация имзоланган. Вучич бу ҳужжат ҳарбий алоқаларни мустаҳкамлаш ва Сербияга қарши иттифоқ шакллантиришга қаратилган деб ҳисобламоқда.
Сербия президенти бу борада кескин баёнот бериб, ушбу давлатлар Сербияга ҳужум қилиш учун иттифоқ тузганини айтди. Унинг фикрича, улар Россия ва Европа ўртасидаги зиддият кучайишини ҳамда Яқин Шарқда кенгроқ уруш бошланиши мумкин бўлган вазиятни кутмоқда.
Вучичнинг сўзларига кўра, глобал беқарорлик кучайган пайтда айрим давлатлар ўз ҳарбий режаларини амалга ошириш учун қулай фурсат пайдо бўлишини кутмоқда.
Шунингдек, Сербия раҳбари Хорватия сўнгги бир ярим йил давомида Сербиянинг барқарорлигига путур етказишга ва унинг ички ишларига аралашишга уринаётганини ҳам таъкидлади.
Шу билан бирга, Вучич Белград ҳарбий нейтраллик сиёсатини давом эттираётганини, бироқ НАТО билан яхши муносабатларни сақлаб қолаётганини ҳам қўшимча қилди.