BMW янги электр i3ни тақдим этди
BMW ўзининг Neue Klasse платформасида қурилган янги электр i3 моделини тақдим этди ва бу компаниянинг EV стратегиясидаги навбатдаги қадамни англатади. Седан жами 469 от кучи берадиган иккита электр мотор билан жиҳозланган, тўлиқ қувватланганда эса эълон қилинган юриш захираси тахминан 700 километрга етади.
Моделнинг асосий жиҳатларидан бири унинг қувватлаш тезлигидир. BMW айтишича, атиги 10 дақиқалик қувватлаш 400 километргача йўл босиш учун етарли энергия бера олади. Бу янги и3'ни тез қувватлаш ва узоқ масофа асосий савдо устунликларига айланиб бораётган премиум электр автомобиллар сегментида кучли рақобатчига айлантириши мумкин.
Автомобилда BMW “симбиотик” деб таърифлайдиган ҳайдовчига ёрдам тизими ҳам мавжуд. У нигоҳ йўналиши ва тана ҳолати каби муҳим ҳайдовчи кўрсаткичларини таҳлил қилиб, айрим вазиятларда бошқарувни автоматик равишда ўз қўлига олиши мумкин. Компания буни янада интуитив ва тезкор хавфсизлик тизими сари ташланган қадам сифатида тақдим этмоқда.
Янги i3 ишлаб чиқарилиши август ойида БМW'нинг Мюнхендаги заводида бошланиши режалаштирилган. Компания ҳозирча расмий нархни эълон қилмаган, бироқ дастлабки ҳисоб-китобларга кўра, автомобиль нархи тахминан 60 минг доллар атрофида бўлиши мумкин. BMW янги моделнинг ташқи ва ички кўринишига оид қўшимча суратларни ҳам эълон қилди.