Тианзҳоу-9 юк кемаси орбитал станциядан ажралиб чиқди
Хитойнинг Тианзҳоу-9 юк кемаси мамлакат орбитал станциясидан муваффақиятли ажралиб чиқди. Бу ҳақда Хитой Марказий телевидениеси хабар берди. Яқин вақт ичида кема бошқариладиган тартибда орбитадан қайтиш жараёнини амалга оширади. Бу ҳақда Ixbt.com хабар беради.
Қайтиш жараёнида конструкциянинг асосий қисми атмосферанинг зич қатламларида ёниб кетади. Қолган парчалар эса олдиндан белгиланган хавфсиз денгиз ҳудудига йўналтирилади. Бу каби жараён юк кемалари ўз миссиясини якунлагандан сўнг амалга ошириладиган стандарт тартиб ҳисобланади.
Тианзҳоу-9 2025-йил 15-июльда учирилган бўлиб, станцияга экипаж учун зарур бўлган озиқ-овқат, жиҳозлар ва бошқа юкларни етказиб берган эди. Хитойнинг орбитал станцияси тахминан 400 км баландликда жойлашган.
Мазкур станция 2022-йилдан буён фаолият юритиб келмоқда ва у 3 нафар космонавт учун мўлжалланган (ротация даврида 6 нафаргача). Станция илмий ва халқаро лойиҳаларни амалга ошириш учун босқичма-босқич кенгайтирилмоқда.