Унөч яшьлек малай нәни энесен унбиш тапкыр пычак белән чәнчеп үтергән

Красноярск өлкәсенең Дудинка шәһәрендә 13 яшьлек Артем (исеме үзгәртелә) нәни энесенә унбиш тапкыр пычак белән кадый. Нәни малай абыйсыннан аш бүлмәсендә качарга маташа. Тик барыбер һәлак була. Бу турыда «Комсомольская правда» хәбәр итте.

Фаҗига 23 апрельдә иртәнге якта була. Малайлар өйдә үзләре генә кала. Бераздан кайткан әни кеше коточкыч хәл күрә. Бөтен фатирның асты-өскә килгән, аш бүлмәсендә идәндә кан күлләвеге эчендә 7 яшьлек Витя (исеме үзгәртелә) мәете ята. Әни кеше олы улын йолкып ала һәм ни булганын сорый. Ләкин малай мыгырдаудан башка сүз әйтә алмый. Имеш, ул йокыдан торганда энесе үлгән булган.

Ольга һәм Андрей гаиләсендә өч бала үсә. Олысы Артем, аннары Витя һәм кечесе Вера була. Ольга малайларын беренче иреннән тапкан. Кызы Вера алты ай элек икенче иреннән туган. Бу гаилә бернинди хисапта да тормый, Ольга турында бөтен җирдә дә яхшы сүз генә әйтәләр.

Фаҗига буласы иртәдә Ольга Вераны ала һәм үз әнисе янына бара. Малайлар өйдә йоклап кала.

Әниләре чыгып киткәч, Артем уяна, ул телефонын алып уйный. Аннары ул уенда җиңелә һәм ярсый башлый. Артем өйнең астын-өскә китерә, җиһазларны җимереп бетерә. Тавышны ишетеп Витя уяна. Ул абыйсының котырганын күреп ала һәм аш бүлмәсенә чыгып кача. Ләкин Артем бирегә килә һәм пычак алып, энесенә кадый башлый.

Соңрак Артем тикшерүчеләргә һәм әнисенә җинаятенең сәбәпләрен әйтә. «Уенда оттырдым. Хәзер минем белән беркем дә дус булмас дип курыктым», — ди ул. Шуннан малай ярсып китә. Аннары энесе барысын да әнисенә сөйләп бирер һәм үзенә эләгер дип уйлый. Шулай итеп Артем пычакка ябыша, диелә бу хәбәрдә.