Йемен: Жаатташкандар Ходейда порту боюнча кепке келишти
Йемендеги жаатташкан тараптар Ходейда порту боюнча кепке келишти. Йемен өкмөтүнүн делегациясы менен шиит жамааты Улуттар уюму ортомчу болуп, Швецияда өтүп жаткан сүйлөшүүлөрдө төрт жылдан берки согушту басууну макулдашты.
Улуттар Уюмунун баш катчысы Антониу Гуттереш Кызыл деңиздеги Ходейда порту өлкөнүн үчтөн эки бөлүгүн кыймылдатып турарын, ок атышууну токтотуу миллиондогон элге жардам жеткирүүгө жол ачарын белгиледи.
Гуттерештин айтканына караганда, макулдашуу «провинциянын жалпы аймагында, шаарда жана портто күчтөрдүн тең салмактуулугун сактоого жана ок атышууну токтотууга» негиз болот.
Жергиликтүү шиит жамааты жана "Иран колдойт" деп эсептелген хуситтер өлкөнүн түндүк-батыш бөлүгүн, борбор шаар Сананы, ошондой эле Кызыл деңиздин жээгиндеги Ходейда порттук шаарын 2015-жылдан бери ээлеп турат.
Йемендин 20 миллион калкы ачарчылыкта, ал эми 250 миң киши андан да оор бүлгүн шартында жашап жатат.