Дыялогу быць!
Увечары беларусы Украіны зладзяць анлайн-сустрэчу са штабам Святланы Ціханоўскай.
Сёння ўвечары беларусы Украіны зладзяць анлайн-сустрэчу са штабам Ціханоўскай. Плануецца, што на сувязі будзе сама Святлана Ціханоўская, а таксама Франак Вячорка, Валерый Кавалеўскі, Аляксандр Дабравольскі і Аляксандра Логвінава. З боку беларускай дыяспары – грамадскія дзеячы, актывісты, валанцёры і журналісты, якія цяпер знаходзяцца ў Кіеве, Львове і Адэсе.
“Наладжваць сувязь са штабам нам давялося аж паўтара года”, – зазначае кіраўніца “Беларускага Дома ва Украіне” Бажэна Жолудзь:
– Задоўга да гэтага Святлана Ціханоўская ведала, што мы звяртаемся да яе, што мы будзем пісаць ліст. То бок, яна была інфармаваная, што ў нас будзе нейкая размова. Мы хочам дыялогу. З адказам крыху зацягнулі. І калі мы ўжо хацелі нават казаць, што нам не адказалі чамусьці, прыйшоў адказ. Мы ўсе былі радыя, што адрэагавалі, што гатовыя пайсці на дыялог. Будзе ў нас zoom, будзем задаваць пытанні, якія мы сабралі ў электроннай форме на майдане ад людзей. Будзем чакаць адказаў і сумеснай працы. Я спадзяюся, што гэта толькі пачатак, а не адзін zoom і на гэтым усё.
Сёння ж на сустрэчы плануецца абмеркаваць пытанні легалізацыі, працы і палітычнай бяспекі беларусаў ва Украіне. Вынікі размовы будуць апублікаваныя ў тэлеграм-канале ды іншых пабліках “Беларускага Дома ва Украіне”.
Марына Савіцкая, Беларускае Радыё Рацыя