Гөлназ Сәфәрова әле кичә генә җир тетрәгән Таиландка ялга киткән

Алып баручы Гөлназ Сәфәрова Таиландка ял итәргә киткән. Әле кичә генә көчле җир тетрәү булган урыннарда йөргән алып баручы өчен язылучылары борчылып беткән.

Аларга җавап итеп, Гөлназ Сәфәрова үзләре булган урында барысы да тыныч булуын яза.

Барлык кызыксынучылар өчен: җир тетрәү Бангкокта булды. Пхукетта барысы да тыныч, Аллаһка шөкер.

Биредә бик кызу, +30, +32 градус. Диңгез бераз дулкынлана, әмма минем өчен идеаль бу. Ә менә апрель ахырында инде дулкыннар нык булачак, чөнки биредә сезон ахырына якынлаша. Ләкин безнең Таиландта май аенда да булган бар, безгә бик ошаган иде.

Тотылып бетмәгән уразам гына тынгы бирми. «Теге» көннәр булу сәбәпле, ай ахырында уразаның 3 көнен калдырырга туры килде. Кайткач, иң беренче итеп, казага калган уразаны тотып бетерергә насыйп булсын, – ди ул.

Алып баручы Таиландка мин ашар өчен килүен дә яшерми.

Диңгез ризыкларын бик яратам. Монда барысы да бик тәмле. Синең алда ук пешереп бирәләр.

Мин гел куллар белән, батып бетеп ашыйм. Моннан 10 ел элек, беренче тапкыр килгәндә, мин бик җирәнгән идем. Кафеларда агуланудан курыктым. Әмма биредә 80 процент кафелар шундый. Чистарак җирне табасың да ашыйсың, кү...не кысып, юк-барын уйламыйча, кыланмыйча гына, – дип сөйли ул.