Рамил Шәраповны балачакта ни өчен «ходячий зихер» дип йөрткәннәр?

Юмор остасы Рамил Шәрапов балачакта үзе белән булган хәлне сөйләп халыкны көлдергән. Аның балачактан җор телле, тапкыр булуын аңлап алганнар.

«Мине авылда «Ходящий Зихер» дип йөртәләр иде. Авыл, яз, юллар юк, пычрак. Әти сөткә җибәрде. Кофены сөтсез эчә алмый ул. Ә сөткә бездән 300 метр ераклыкта торган классташларга барам. Мин «восьмерка» көпчәкле сәпитем белән чыгып киттем. Рәхәт! Кошлар сайрый. Әлфия апа сөт сава, без кластташ белән «денди» (чыккан гына вакыты) уйныйбыз. 3 сәгать уйнап утырганбыз.

«Домашний» телефонга әти шалтырата. «Хәзер үк кайтмасаң» дигән сүзеннән үк кайткач нәрсә булачагы аңлашыла иде инде. Чаптырып кайтам. Сәпитнең «брызговигы» юк. Өс пычрак. Руль төбендә нәрсәдер сизенгән кебек 3 литрлы банка белән сөт шакылдап кайта. Кайтып җиттем дигәндә генә өй алдындагы пычракка сузылып ятылмасынмы. Күз алдыгызгы китерегез, мин күлләвектә ятам. Сөт ватылган. Пычрак су белән ап-ак сөт кушылып бара. Шул вакытта капка ишеге ачылды, әти чыкты. «Нишләп ятасың», – ди. Мин дә аптырап тормадым, «кофе с молоком» ясап ятам дидем», – дип балачак хатирәсен искә алган артист.