Норуодунай бэйиэт бэйэтин кинигэлэрин бибилэтиэкэ пуондугар туттарда
Ыам ыйын 21 күнүгэр Национальнай бибилэтиэкэҕэ олус суолталаах тэрээһин буолла. Ол курдук норуодунай бэйиэт Наталья Ивановна Харлампьева айар үлэтэ саҕаламмыта 50 сылынан, Национальнай бибилэтиэкэ 100 сылын көрсө бэйэтин кинигэлэрин бибилэтиэкэ пуондугар үөрүүлээх быһыыга-майгыга туттарда. Наталья Харлампьева «Кинигэлэрбин туттарыы сиэрэ-туома миэхэ улахан суолталаах. Тоҕо диэтэххэ, атын дойду литератордарын, суруйааччыларын кытары доҕордоһуум саамай сыаналаах түмүктэрин бэлэх уунабын”, — диэн бүгүҥҥү тэрээһин суолтатын бэлиэтээтэ.
Тэрээһини Саха сирин Суруйааччыларын сойууһун бэрэссэдээтэлэ, “Чолбон” сурунаал бас эрэдээктэрэ Гаврил Андросов иилээн-саҕалаан ыытта.
Наталья Ивановна Харлампьева, норуодунай бэйиэт, Россия уонна Саха сирин култууратын үтүөлээх үлэһитэ, уопсастыбаннай уонна бэлитиичэскэй диэйэтэл. Наталья Харлампьева поэзияҕа философскай сүүрээни күүһүрдэн биэрбит поэт буолар. Кини элбэх айымньылара казах, поляк, татар уонна да атын омуктар тылларынан тылбаастаннылар. Наталья Ивановна норуоттар икки ардыларыгар литератураны сайыннарыыны салайан, саха литературатын ыырын кэҥэтэр үлэни тутан олорор.
Кини бэйиэт эрэ буолбакка, публицист, эрэдээктэр. «Саха сирэ” хаһыакка өр кэмҥэ салайааччынан үлэлээбитэ.
Култуура уонна духуобунас сайдыытын министиэристибэтигэр миниистир бастакы солбуйааччыта этэ. Салайааччы быһыытынан өрөспүүбүлүкэбитигэр духуобунас сайдыытыгар улахан кылаатын киллэрбитэ.
Бу күн СӨ култуураҕа уонна духуобунай сайдыыга миниистирэ Афанасий Ноев эҕэрдэлээтэ уонна “Төрөөбүт тыллары харыстааһыҥҥа кылаатын иһин” бэлиэни туттарда. Уонна Наталья Ивановнаны биир идэлээхтэрэ, суруйааччылар, суруналыыстар, айар үлэҕэ бииргэ алтыһар улуустарын бэрэстэбиитэллэрэ, кини талааныгар сүгүрүйээччилэр уо.д.а. эҕэрдэлээтилэр. Дьокуускай куорат мэрин солбуйааччы Владимир Аржаков, Нам улууһун баһылыгын социальнай боппуруостарга солбуйааччы Юрий Дьяконов, суруйааччылар Сэмэн Тумат, Елена Слепцова-Куорсуннаах, Олег Сидоров, Владислав Доллонов, “Айар” кыһа салайааччылара Август Егоров, Валерий Луковцев, “Сахабэчээт” генеральнай дириэктэрэ Ньургуйаана Стручкова, “Далбар хотун” сурунаал эрэдээктэрэ Айталина Никифорова уо.д.а. эҕэрдэ тылларын анаатылар. Наталья Ивановна эрэдээктэринэн үлэлээбит “Саха сирэ” хаһыатыттан кини солбуйааччытынан үлэлээбит Иван Ксенофонтов-Силиги бииргэ үлэлээбит кэмнэрин истиҥник ахтан-санаан ааста. Ырыаһыт Лэгэнтэй Наталья Харлампьева тылларыгар «Азия хотун» ырыаны толордо.
Биһиги кыһабыт Наталья Ивановналыын саха литературата сайдарын туһугар ыкса үлэлиир. Ол курдук кыһа салайааччыта Август Васильевич Егоров этиититтэн:
“Наталья Ивановналыын национальнай кинигэ кыһата 30-ча сыл тухары бииргэ эн мин дэһэн литература, кинигэ, суруйааччылар, ааҕааччылар тустарыгар бииргэ үлэлээн-хамнаан, айан-тутан кэлбиппититтэн астынабыт, киэн туттабыт. Үгүстэр Наталья Ивановна сүрдээх мындыр, киниттэн элбэҕи туһанабыт диэн эттилэр. Биһиги эмиэ киниэхэ наһаа улахан махталлаахпыт. Хомойуох иһин, урут-уруккуттан тоҕо эрэ кинигэ тахсыытын кыпчыйар үгэс баар. Оттон Наталья Ивановна кинигэ тахсыытын киэҥник анааран көрөр буолан, бу литератураны, эдэр суруйааччылар үүнэн-сайдан тахсыыларын күөмчүлээһин буолар диэн, ис сүрэҕиттэн ылсан кыһа үбүлээһинин боппуруоһугар өрөспүүбүлүкэ салалтатыгар ылыннарыылаахтык тиэрдэр, кэпсэтэр. Биһиги бу күн үлэлии-хамныы олорорбутугар кини үтүөтэ-өҥөтө сүҥкэн диэн сыаналыыбыт уонна улаханнык махтанабыт. Ааҕааччыларбыт, суруйааччыларбыт, кыһа аатыттан итии-истиҥ эҕэрдэ буолуохтун!»
Бүгүҥҥү бэлэх Саха литературата төрүттэммитэ 125 сылыгар олус тоҕоостоох буолла. Наталья Ивановнаҕа өссө да элбэх саҥа бырайыактары, айымньылары баҕарабыт!
Сообщение Норуодунай бэйиэт бэйэтин кинигэлэрин бибилэтиэкэ пуондугар туттарда появились сначала на SAKHALIFE.