Team-ը չորրորդ տարին շարունակ աջակցում է Koreez մրցանակաբաշխությանը
Ամփոփվել են Team Telecom Armenia-ի տեխնոլոգիական գործընկերությամբ անցկացվող Koreez մրցանակաբաշխության արդյունքները:
Այս տարի առարկայական ծրագրերի եւ հատուկ ընտրված թեմաների հիման վրա ստեղծված ինտելեկտուալ մրցույթին մասնակցել է շուրջ 25 000 աշակերտ Հայաստանի դպրոցներից:
«Կրթության ոլորտում կատարված յուրաքանչյուր ներդրում է մեր երկրի ապագայում: Այդ է պատճառը, որ ոլորտի աջակցությունը մեզ համար՝ որպես հայկական օպերատոր, ռազմավարական նշանակություն ունի: Մենք կարեւորում ենք, որ որակյալ կրթությունը հասանելի լինի յուրաքանչյուր երեխայի, նպաստի նոր գիտելիքների ձեռքբերմանն ու օգնի աշակերտներին բացահայտելու եւ էլ ավելի զարգացնելու իրենց տաղանդները»,- ասել է Team Telecom Armenia-ի գլխավոր տնօրեն Հայկ Եսայանը:
Team-ը նաեւ մրցանակներ է տրամադրել մրցույթում հաղթանակներ գրանցած երեք աշակերտի՝ նպատակ ունենալով նպաստելու նորագույն տեխնոլոգիաների կիրառման միջոցով կրթության հասանելիության խթանմանը:
«Արդեն չորրորդ տարին է, ինչ մեզ աջակցում է մեր վստահելի գործընկերը՝ Team Telecom Armenia-ն, որը կանգնած է կրթական նորարար նախաձեռնությունների կողքին։ Այս համագործակցությունը վերածվել է իրական կրթական շարժման, որը ոգեշնչում է հազարավոր երեխաների ամբողջ հանրապետությունից։ Շուրջ 60 000 աշակերտ արդեն մասնակցել է Koreez-ի իրականացրած մրցույթներին։ Նրանք ոչ միայն ցուցադրել են իրենց գիտելիքն ու տաղանդը, այլեւ բացահայտել են սեփական ներուժը՝ հավատալով, որ կարող են հասնել ավելիին։ Շատերի համար այս ծրագիրը դարձել է իրական շրջադարձ՝ բացելով նոր հորիզոններ ու հնարավորություններ եւ ձեւավորելով ինքնավստահության այն զգացումը, որը հիմք է ապագայի հաջողակ, նախաձեռնող եւ կրթված սերնդի համար»,- նշել է Koreez մրցույթն անցկացնող «Նոր սերնդի դպրոց» հասարակական կազմակերպության նախագահ Սուրեն Ալոյանը:
Koreez-ն ստեղծվել է 2020 թվականին՝ ոլորտում ավելի քան 15 տարվա հաջողված ծրագրեր իրականացնելու փորձ ունեցող Dasaran կրթական ծրագրի թիմի կողմից։ Մրցույթի թեստ-հարցաշարերը հիմնված են դպրոցական ծրագրի վրա։