Дональд Трамп үзен Венесуэла президенты вазифаларын башкаручы дип игълан итте
АКШ Президенты Дональд Трамп үзен Венесуэла Президенты вазифаларын вакытлыча башкаручы дип игълан итте. Моңа кагылышлы, имеш «Википедия»дән алынган скриншотны ул үзе нигез салган Truth Social социаль челтәрендәге сәхифәсендә бастырды. Бу турыда «Татар-информ» яза.
Скриншотта Трампның 2026 елның гыйнварыннан Боливариан Республикасы җитәкчесе вазифаларын вакытлыча башкаручы булуы күрсәтелгән. Төгәл дата исә күрсәтелмәгән.
Күрәсең, АКШ лидерының башка күп кенә белдерүләре кебек үк, әлеге язма да ярымшаян, ярымҗитди характерда. Аны туры мәгънәдә кабул итәргә ярамый, әмма ул Трампның Латин Америкасы илен контрольгә алу нияте барлыгын раслый.
Венесуэла Президенты Николас Мадуро һәм аның хатыны Силия Флорес 3 гыйнварга каршы төндә АКШ хәрбиләре тарафыннан тоткарланды.
АКШ хакимиятендә булган мәгълүматларга караганда, рейд вакытында Венесуэлада 67дән алып якынча 80 кешегә кадәр һәлак булган. Алар арасында Венесуэла һәм Куба көч структуралары вәкилләре дә, тыныч халык та бар. Берничә америкалы яраланган, аларның икесе хәзерге вакытта дәвалануын дәвам итә.
Соңрак Венесуэла хакимияте илдә ким дигәндә 100 кешенең һәлак булуын һәм якынча шул кадәр үк кешенең яралануын белдерде. Куба хөкүмәте исә моңа кадәр үк Венесуэлада 32 хәрби хезмәткәр һәм разведчикның һәлак булуы турында хәбәр иткән иде.
Венесуэлада дәүләт башлыгы вазифаларын вакытлыча башкаручы итеп башкарма вице-президент Дельси Родригес игълан ителде.