Білім саласы басты назарда: 2025 жыл қорытындыланып, ағымдағы жылға арналған міндеттер белгіленді.
Өңір басшысы Ғауез Нұрмұхамбетовтың қатысуымен білім басқармасының кеңейтілген алқа отырысы өтті. Өткен жылды қорытындылап, ағымдағы жылға арналған негізгі міндеттер айқындалды.
Мемлекет басшысы Қасым-Жомарт Тоқаев білім сапасын арттыруға, мектептерді цифрлық трансформациялауға, білікті мамандар даярлауға, сондай-ақ оқушылардың бойында отансүйгіштік құндылықтарын қалыптастыруға ерекше мән беріп келеді.
— 2025 жылы облыстың білім беру инфрақұрылымын ауқымды жаңғырту жұмыстары жүргізілді: 35 білім беру нысанына жөндеу жұмыстары жүргізіліп, 83 мектеп жаңғыртылды. «1300 мектепті реновациялау» жобасы аясында 11 білім беру ұйымының материалдық-техникалық базасы нығайтылды. Шағын жинақты мектептер 80 заманауи кабинетпен жабдықталды, 13 мектепте күрделі жөндеу жұмыстары жүргізілді. Назарбаев Зияткерлік мектептерімен бірлеске жоба жүзеге асырылды, — деп атап өтті өңір басшысы.
Одан бөлек, облыста педагогтердің кәсіби деңгейін арттыруға, цифрлық құзыреттерін дамытуға және жұмысшы кадрларды даярлауға ерекше назар аударылуда. Заманауи жабдықтарды пайдалана отырып сабақ өткізудің жаңа тәсілдері белсенді енгізіліп, қосымша білім беру және тәрбие бағытындағы жобалар іске асырылуда.
Ағымдағы жылы Мемлекет басшысы айқындаған міндеттерге сәйкес білім беру жүйесін одан әрі цифрландыру, заманауи білім беру платформалары мен жасанды интеллект технологияларын енгізу, мектептердің материалдық-техникалық базасын нығайту, оқыту сапасын арттыру және еңбек нарығында сұранысқа ие мамандар даярлау жұмыстары жалғасын табады.