Хоттэӆат шавиты Емаң тут Ямал мувева туса
Хон мувеван «Хоттэӆ Таӆ» постаты «Родные-Любимые» форум манас. Щёрас моӆтаскем хоят, айӆат ёх семьяйт, ветъяң таӆ моӆтаскем яха уӆты имет-икет, ар няврэм тайты хоттэӆат арсыр мув сыӆат эӆты Москва вошан яха актащисат. Шоши мувев эӆты вохам хоятат па усат. Ун вантопсайн яха ханшӆтантыйм айӆат ёх Александр Худи па Илона Окотэтто катхощъяң семья кутан емаң тут вущитты порайн вана вохман усңан. Емаң тут Муромской Свято-Троицкой нэңат уӆты монастырь эӆты туса. Щита хоттэӆат шавиты емаң хоятңан Пётр па Феврония лоттаман уӆӆатан. Щи тут эӆты катхощъяң тут няӆм тут суна понман Россия мувев регионата па ДНР, ЛНР муват пеӆа лакки китса. «Мин ийимем пиӆан шеңк воӆаң, вещкат партапсайн масайман. Емаң тут няӆм шоши мувева ёхтаптаты. Хон мувев ар мув сыӆат кутан Ямал мувева ортам ураңан мет ун ёран ёхатӆайман», — Александр Худи ястас. Владимир Путин ястам щиран: «Россия — щит арсыр семьяйт йи ун хоттэӆ. Муй арат таӆ йи муван уӆман, кутаңа ант уӆӆысув. Кашң хоят ӆув рут хоятӆаӆ уӆапсаяӆан уӆ, рут ясңаӆан потартаӆ. Щит эӆты муң мет самаңа па мосмаңа кутӆуван уӆлув. Яха катӆащман хоттэӆ щир уӆапсаев шавиман мет юраңа йиӆув». Пулңават вошан тут сун Пётр па Павел апостолңан нэмпи Турам хота па ЗАГСа ӆоңаӆcа. Таӆта Емаң тут няӆмат УрФО муват пеӆа еӆӆы китcайт. Зоя Куртямова ханшам потар