Ака вăй илет

Кăçал çуркунне ир килчĕ. Чăваш Енри хуçалăхсенче 161 000 гектар çинче пĕрчĕллĕ тата пăрçа йышши культурăсене акнă. Ку – планпа палăртнин 72 проценчĕ. Пĕлтĕр çак вăхăт тĕлне 3 000 гектар çĕре çеç ĕçе кĕртнĕ пулнă. Иртнĕ çул çумăр суса тăни акан вăхăтне тăсрĕ пулсан, кăçал хĕвеллĕ кунсем савăнтараççĕ. Çанталăк парсан 5-10 кунта ака пĕтĕмпе вĕçленмелле. Çапла палăртрĕç Правительство çуртĕнче иртнĕ ларура.

Республикăра талăкне 8 000 гектар çĕре ĕçе кĕртеççĕ. Елчĕксем 17 000 ытла гектар çинче пĕрчĕллĕ тата пăрçа йышши культурăсене акнă. Ку – кирлин 93 проценчĕ. Вĕсем хыççăнах патăрьелсем, улатăрсем, канашсем пыраççĕ. Çак муниципаллă округсенче çывăх кунсенче ака пăтти çимелле. Çав вăхăтрах Етĕрне, Шупашкар, Сĕнтĕрвăрри тăрăхĕсенче тар кăлармалăх пур. Вĕсенче палăртнин çуррине те акман. Çĕр улми лартма тухнă. Хальлĕхе «иккĕмĕш çăкăр» 400 ытла гектар çинче вăй илет. Ял хуçалăхĕнче ĕçлекенсене патшалăх пулăшма тăрăшать. Çĕр çинче вăй хуракансене хавхалантарма кăçал хыснара 3 миллиард ытла тенкĕ пăхса хăварнă. Çăмăллăхлă кредит илекенсем валли тĕрев – 740 миллион тенкĕ. Çу уйăхĕн 2-мĕшĕччен ял хуçалăх таварне туса илекенсем патне 968 миллион тенкĕ тĕрев укçи çитернĕ. Çак палăртнин 30 проценчĕ. Хавхалантармалли укçана вăхăтлă парассипе Чăваш Ен Атăлçире 4-мĕш вырăн йышăнать. Чăваш Республикин Пуçлăхĕ Олег Николаев ака вĕçленсен им-çампа мĕнле усă курнине тишкерме ыйтрĕ. Пĕлтĕр гектартан 30-33 центнер илме май пур çĕрте 17-18 центнер тухăçлă пулнă хуçалăхсем те пур. «Сăлтавĕ – çĕнĕ технологипе, им-çампа усă курманни», – терĕ Олег Алексеевич. «Вăл е ку хуçалăх мĕнле ĕçленинче муниципалитетăн пĕтĕмĕшле аталанăвĕ те курăнать», – çапла палăртса регион ертӳçи çĕрпе тухăçлă усă курмаллине, сухаламан гектарсем пулмалла маррине каларĕ.